Prem Kumar Nazar
ik pal ki dauḌ dhuup men aisa thaka badan
main ḳhud to jagta huun magar so gaya badan
bachcha bhi dekh le to humak kar lapak paḌe
aisi hi ek chiiz hai vo dudhiya badan
ji chahta hai haath laga kar bhi dekh len
us ka badan qaba hai ki us ki qaba badan
jab se chala hai tang qamison ka ye rivaj
na-ashna badan bhi lage ashna badan
ganga ke paniyon sa pavitra kahen jise
ankhon ke taT pe tairta hai jo gaya badan
bistar pe tere mere siva aur kaun hai
mahsus ho raha hai koi tisra badan
dharti ne mausamon ka asar kar liya qubul
rut phir ga.i to ho gaya us ka hara badan
is ko kahan kahan se rafu kijiye ‘nazar’
behtar yahi hai oḌhiye ab dusra badan
Leave a Reply