Ghanim Se Bhi Adawat Mein Had Nahin Mangi

ghanim se bhi adavat men had nahin mangi

ki haar maan li lekin madad nahin mangi

hazar shukr ki ham ahl-e-harf-e-zinda ne

mujaviran-e-adab se sanad nahin mangi

bahut hai lamha-e-maujud ka sharaf bhi mujhe

so apne fan se baqa-e-abad nahin mangi

qubul vo jise karta vo iltija nahin ki

dua jo vo na kare mustarad nahin mangi

main apne jama-e-sad-chak se bahut khush huun

kabhi aba-o-qaba-e-khirad nahin mangi

shahid jism salamat uthae jaate hain

jabhi to gor-kanon se lahad nahin mangi

main sar-barahna raha phir bhi sar-kashida raha

kabhi kulah se tauqir-e-qad nahin mangi

ata-e-dard men vo bhi nahin tha dil ka gharib

‘faraz’ main ne bhi bakhshish men had nahin mangi

Leave a Comment