zaḳhm dekhe na mire zaḳhm ki shiddat dekhe
dekhne vaala miri ankhon ki hairat dekhe
mujh pe asan hai kahe lafz ka iifa karna
us ko mushkil hai to vo apni suhulat dekhe
dil liye jaata hai phir ku-e-malamat ki taraf
aankh ko chahiye phir ḳhvab-e-hazimat dekhe
koi surat ho ki inkar se pahle aa kar
kis qadar us ki yahan par hai zarurat dekhe
dil tazabzub men hi rahta hai ba-vaqt-e-paiman
lafz dekhe ki ruḳh-e-yar ki rangat dekhe
aankh bhar jaati hai is kasrat-e-nazzara se
dil to har shakl men bas ek shabahat dekhe
Leave a Reply