Jafar Sahni
shar ki baton men tamazat ka nishan ho ki na ho
aag lagti hai to siine men dhuan ho ki na ho
shauq ko apne zara tez-qadam hi rakhna
thamne haath kabhi bad-e-ravan ho ki na ho
sail ke ghaiz se larzan hai tasavvur ka badan
bahte paani ke takallum se guman ho ki na ho
dil ke ḳhane men kashish ḳhuub mili hai raushan
us ki mahfil ka saman rashk-e-jinan ho ki na ho
dard-mandi ki faza ham to karenge qaa.em
sehn-e-dil-dar liye aks-e-fughan ho ki na ho
apni palkon pe chalo aaj nami kuchh bhar len
shabnami husn men tar phir se jahan ho ki na ho
mujh ko maujud to har moḌ pe vo lagta hai
chand taron ki nigarish se ayaan ho ki na ho
soch rahti hai aqidat se sharabor sada
narm lahje men dua vird-e-zaban ho ki na ho
main to mashkuk nahin us ki vafa se ‘ja.afar’
ek mauhum ishare men bhi haan ho ki na ho
Leave a Reply