Poet
jaate hai khanqah se vaaiz salam hai
ham dair se chale sanam ab raam raam hai
surat vo sanvli ki kanhayya ghulam hai
mere sanam se khub-tar allah ka naam hai
dar-pesh hai vo manzil-e-na-taqati hamen
utthe jo ham-safar hai jo baithe maqam hai
sayyad hi bahar ke parde men bulbulo
har ghuncha hai qafas rag-e-gul tar-e-ram hai
kyuun kar na meri yaad faramosh ho use
samjha hai yaar nang jise mera naam hai
mera lahu chataega jab tak na tegh ko
qatil ko dahne haath ka khana haram hai
saaqi se ho jo dil-shikani bhi to lutf hai
tuuta jo shisha meri baghal ka to jaam hai
fasl-e-bahar baat ki baat is chaman men hai
avaz-e-ghuncha rukhsat-e-gul ka payam hai
masti tapak rahi hai yahan baal baal se
tan men lahu nahin ye mai-e-laal-fam hai
tahrir-e-hal ki kise taqat hai nama-bar
hai jaan honton par ye zabani payam hai
vo mah-ru chhupa hai mahaq-e-hijab men
ashiq ke zindagi ka mahina tamam hai
samjhe rahen bahut mire kam-maegi harif
qatra vo huun ki aaj mira ‘bahr’ naam hai
Leave a Reply