phenkte sang-e-sada dariya-e-virani men ham
phir ubharte daera-dar-daera paani men ham
ik zara yunhi basar kar len giran-jani men ham
phir tumhen sham-o-sahar rakkhenge hairani men ham
ik hava akhir uda hi le gai gard-e-vajud
sochiye kya khaak the us ki nigahbani men ham
vo to kahiye dil ki kaifiyyat hi aina na thi
varna kya kya dekhte is ghar ki virani men ham
mahv-e-hairat the ki be-mausam nadi payab thi
bas khade dekha kiye utre nahin paani men ham
us se milna aur bichhadna der tak phir sochna
kitni dushvari ke saath aae the asani men ham
Leave a Reply