mujh bala-nosh ko talchhaT bhi hai kaafi saaqi
bhar de chullu men jo ho shishe men baaqi saaqi
bhar ke pilvata nahin ek piyali saaqi
saari main mangta huun deta hai aadhi saaqi
tu ne kya atish-e-hal-karda pila di saaqi
bhuun Daala hai jigar aag laga di saaqi
phuul mangun to pilata hai baranDi saaqi
karta hai bazm-e-guzishta ki talafi saaqi
jam-e-jam chahiye rindon ko na shahi saaqi
saltanat hai tire kuche ki gada.i saaqi
jaam auron ko diye mujh ko piyali saaqi
ḳhud bahakne laga manind-e-sharabi saaqi
kya karun pi ke bhala ek piyali saaqi
is tunuk-zarfi ka banda nahin aadi saaqi
kab se kahta huun bala-nosh main saaqi saaqi
aur pilva de jo ho shishe men baaqi saaqi
maraz-e-hijr men mai garche muzir hai lekin
main to pi jaata huun allah hai saaqi saaqi
sub.h se shaam talak haath se chhuTta nahin jaam
chahiye apna taḳhallus kare jaami saaqi
maslahat hogi jo mahrum rakha mai se mujhe
fel hikmat se nahin hai tira ḳhali saaqi
mast kya janen kidhar dair hai ka.aba hai kahan
umr saari tiri bhaTTi men guzari saaqi
masjid o dair o kalisa ki vo raunaq na rahi
tu ne buniyad jo mai-ḳhane ki Daali saaqi
dekhiye sohbat-e-na-jins nibhegi kyun-kar
past-himmat tu tabi.at miri aali saaqi
fasl-e-gul aa chuki kya duur se dahkata hai
mai-e-gul-rang se bhar bhar ke gulabi saaqi
va.izo vohi karunga main jo fatva dega
qibla-o-kaba o murshid mira haadi saaqi
shisha-o-jam o subu honge abhi chaknachur
mast bahke to baḌi hogi ḳharabi saaqi
koi aafat tire mai-ḳhane pe aa sakti hai
sab dua-go hain ye jitne hain sharabi saaqi
sirf lillah bhi mai-ḳhane men jaari kar de
muqtazi ho jo tiri himmat-e-ali saaqi
tang ho kar tire har baar ke dahkane se
kos baiThe na koi rind-e-sharabi saaqi
jo piyega na sharab aaj vo mujrim hoga
ku-ba-ku kal se tu kar de ye munadi saaqi
dard bhi mujh ko pila dega tu bad-masti men
sab suna dunga main divan-e-zulali saaqi
barf pilva ke kaleja mira ThanDa kar de
ab-e-angur ne to aag laga di saaqi
tera ji chahe to pilva de koi jam-e-sharab
haath phailane ka banda nahin aadi saaqi
nafs-e-garm ki tasir ne mai saghar se
sho.ala-e-lafz ke manind uḌa di saaqi
aur to hasraten sab ‘rind’ ke dil se niklin
jam-e-kausar ki tamanna rahi baaqi saaqi
Leave a Reply