Poet
ashiq hai jo tumhare rukh-e-surkh-rang ka
rahta hai us ko nashsha sharab-e-farang ka
kahte hain log dekh tere rukh pe khaal ko
kya hukm rome men hai sipahdar zang ka
ai rashk-e-hur vusat-e-jannat men bhi mujhe
tujh bin hai be-guman yaqin gor-e-tang ka
jab se patang huun main tire shama-ru ka yaar
maalum tha na tujh ko udana patang ka
khauf-e-khuda na hota to rakhta main ai sanam
arsh-e-azim naam tumhare palang ka
ai sabz-rang mast-e-mai-e-ishq-o-husn to
afyun ko puchhte nahin kya zikr bhang ka
khal-e-rukh-e-nigar hain chehre khayal men
biini dikhai de hai donali tufang ka
matam mira hai yaar siva ham ko bazm-e-nur
saut-e-buka se kam nahin avaz chang ka
atish ka sher padhta huun aksar ba-hasb-e-hal
dil said hai vo bahr-e-sukhan ke nahang ka
vo chashm ghaat men dil-e-pur-dagh ke nahin
aahu ko hai irada shikar-e-palang ka
namus ka to fikr hai ‘matam’ abas yahan
ye ishq khasm naam ka dushman hai nang ka
Leave a Reply