Poet
yaan chala aa.e jo vo sim-badan aap se aap
dafa.a ho dil se mire ranj-o-mehan aap se aap
mat raho chin-ba-jabin us se ki koi din men
is se be-saḳhta vo degi shikan aap se aap
kal use dekh ke bhar aa.i jo chhati meri
bhar ga.e siine ke sab zaḳhm-e-kuhan aap se aap
us ke ruḳhsar ko kab dil se bhulaya ham ne
ruk gaya ham se vo kuchh rashk-e-chaman aap se aap
asar-e-jazb yuun ghurbat men dikha.un aarif
aa ke maujud ho vo mulk-e-vatan aap se aap
Leave a Reply