bahut duur tak
ye jo viran si rahguzar hai
jahan dhuul udti hai
sadiyon ki be-e’tinai men
khoe hue
qafilon ki sadaen bhatakti hui
phir rahi hain, darakhton men
aansu men
sahraon ki khamushi hai
udhadte hue khvab hain
aur udte hue khushk patte
kahin thokaren hain
sadaen hain
afsun hai samton ka
hadd-e-nazar tak
ye tarik sa jo kura hai
ufuq-ta-ufuq jo ghaneri rida hai
jahan aankh men tairte hain zamane
ki ham dubte hain
to is men
taalluq hii, vo raushni hai
jo insan ko jiine ka rasta dikhati hai
kandhon pe
hathon ka lams-e-gurezan hain
hone ka mafhum hai ghaliban
vagarna vahi raat hai char-su
jis men ham tum bhatakte hain
aur ladkhadate hain, girte hain
aur asman, haath apne badha kar
kahin taank deta hai ham ko
kahin phir chamakte, kahin tutte hain
Leave a Reply