Poet
khali ashiq se kabhi kucha-e-janan na raha
kaun si shab vo thi jis men koi giryan na raha
dekhiye nakhun-e-vahshat ke sabab ashiq ka
tar-e-daman na raha tar-e-gareban na raha
shaikh kya vaaz sunata hai dikhane ke liye
dil men tasvir-e-sanam hai tira iman na raha
ho gaya saath dil-e-zar ke vo bhi rukhsat
maya-e-zist jo apna tha vo arman na raha
ham-safiro na kaho naghma-zani ko mujh se
ab chali bad-e-khizan aur gul-e-khandan na raha
rukh dikhate hi kiya mahv-e-tamasha tu ne
kab tira shefta aina sa hairan na raha
ashk-e-dida to hue khushk ‘jamila’ kah do
khizr tum aae to kya chashma-e-haivan na raha
Leave a Reply