us ki ḳhvahish pe na.e sher barabar kahna
aur phir sun ke unhen us ka mukarrar kahna
ḳhushk ankhen liye hansta hua dekho jis ko
us ko sahra nahin kah dena samundar kahna
kya ajab hai ki ho beTe ki faqat haar pe haar
aur maan ka use har baar sikandar kahna
ye to ham hain baḌe dil vaale jo kah dete hain
varna asan nahin apne se behtar kahna
pahle ham ‘mir’ ke qadmon ko zara chuum aa.en
ba.ad men yaaro hamen khul ke suḳhnavar kahna
ishq ke maron ko kahna nahin dekho kuchh bhi
aur agar kahna hi chaho to qalandar kahna
Leave a Reply