Insha Allah Khan Insha
mujhe kyuun na aave saaqi nazar aftab ulta
ki pada hai aaj khum men qadah-e-sharab ulta
ajab ulte mulk ke hain aji aap bhi ki tum se
kabhi baat ki jo sidhi to mila javab ulta
chale the haram ko rah men hue ik sanam ke ashiq
na hua savab hasil ye mila azaab ulta
ye shab-e-guzishta dekha vo khafa se kuchh hain goya
kahen haq kare ki hove ye hamara khvab ulta
abhi jhad laga de barish koi mast badh ke naara
jo zamin pe phenk maare qadah-e-sharab ulta
ye ajiib majra hai ki ba-roz-e-id-e-qurban
vahi zabh bhi kare hai vahi le savab ulta
yunhi vaada par jo jhute to nahin milate tevar
ai lo aur bhi tamasha ye suno javab ulta
khade chup ho dekhte kya mire dil ujad gae ko
vo gunah to kah do jis se ye dah-e-kharab ulta
ghazal aur qafiyon men na kahi so kyunki ‘insha’
ki hava ne khud-bakhud aa varaq-e-kitab ulta
Leave a Reply