duriyan simaTne men der kuchh to lagti hai
ranjishon ke miTne men der kuchh to lagti hai
hijr ke dorahe par ek pal na Thahra vo
raste badalne men der kuchh to lagti hai
aankh se na haTna tum aankh ke jhapakne tak
aankh ke jhapakne men der kuchh to lagti hai
hadisa bhi hone men vaqt kuchh to leta hai
baḳht ke bigaḌne men der kuchh to lagti hai
ḳhushk bhi na ho paa.i raushna.i harfon ki
jan-e-man mukarne men der kuchh to lagti hai
fard ki nahin hai ye baat hai qabile ki
gir ke phir sambhalne men der kuchh to lagti hai
dard ki kahani ko ishq ke fasane ko
dastan banne men der kuchh to lagti hai
dastaken bhi dene par dar agar na khulta ho
siḌhiyan utarne men der kuchh to lagti hai
ḳhvahishen parindon se laakh milti-julti hon
dost par nikalne men der kuchh to lagti hai
umr-bhar ki mohlat to vaqt hai ta.aruf ka
zindagi samajhne men der kuchh to lagti hai
rang yuun to hote hain badalon ke andar hi
par dhanak ke banne men der kuchh to lagti hai
un ki aur phulon ki ek si rida.en hain
titliyan pakaḌne men der kuchh to lagti hai
zalzale ki surat men ishq vaar karta hai
sochne samajhne men der kuchh to lagti hai
bhiiḌ vaqt leti hai rahnuma parakhne men
karvan banne men der kuchh to lagti hai
ho chaman ke phulon ka ya kisi pari-vash ka
husn ke sanvarne men der kuchh to lagti hai
mustaqil nahin ‘amjad’ ye dhuan muqaddar ka
lakḌiyan sulagne men der kuchh to lagti hai
Leave a Reply