Poet
phuul apne vasf sunte hain us ḳhush-nasib se
kya phuul jhaḌte hain dahan-e-andalib se
afshan tiri jabin ki hamari nazar men hai
ham dekhte hain arsh ke taare qarib se
tanha lahad men huun to dabate hain ye mujhe
kya kya ulajh rahe hain malak mujh gharib se
ka.abe men un ka nuur madine men hai zuhur
abad donon ghar hain ḳhuda ke habib se
yarab bura ho dil ki taḌap ka ki bazm men
baiThe vo duur uTh ke hamare qarib se
mar ja.un main to jaao mubarak ho jan-e-man
allah se mujhe tumhen milna raqib se
pahlu-tahi jo karti hai milne men meri nabz
kahte hain ye sharir mili hai tabib se
mamnun huun main hazrat-e-‘naushad’ ka ‘vasim’
milte hain kya ba-lutf huzur is gharib se
Leave a Reply