akhlaq-ahmad-ahan

Ye Tere Lams Ka Ehsas Jawan-Tar Ho Jae

ye tire lams ka ehsas javan-tar ho jaae

ye tire qurb men har saans javan-tar ho jaae

chaah ik der se ik raah taka karti hai

aao pahle ki vahan ghaas javan-tar ho jaae

hain kai chehre guzarte hue rah-e-dil se

dekhiye kaun sa almas javan-tar ho jaae

rasm-e-duniya ke salasil men giraftari hai

mat Thaharna ki kahin phans javan-tar ho jaae

bazm-e-ulfat ki giraftari se kaise bach paaen

kis ko ma.alum ki kab aas javan-tar ho jaae

ham sanjoe hue rakkhe hain tiri yadon ko

vaqt aae ki jo hai paas javan-tar ho jaae

us ki manzil ka pata kis ko mila hai ab tak

haan vahi bedil-e-barlas javan-tar ho jaae

More Poems

Leave a Comment