juda.iyon ke tasavvur hi se rula.un use
main jhuT-muT ka qissa koi suna.un use
use yaqin hai kitna miri vafaon ka
ḳhilaf apne kisi roz varghala.un use
vo tapti dhuup men bhi saath mere aa.ega
magar main chandni-raton men azma.un use
ghamon ke sahra men phirta rahun use le kar
udasiyon ke samundar men saath la.un use
maza to jab hai use bhiiḌ men kahin kho duun
phir us ke ba.ad kahin se main DhunD la.un use
ye kya ki roz vahi soch par musallat ho
kabhi to aisa ho kuchh der bhuul ja.un use
kuchh aur ḳhvab bhi us se chhupa ke dekhe hain
kuchh aur chehre nigahon men hain dikha.un use
vo giili miTTi ki manind hai magar ‘hamid’
zaruri kya hai ki apna hi sa bana.un use
Leave a Reply