saleem-kausar

Kaise Hangama-E-Fursat Mein Mile Hain Tujhse

kaise hangama-e-fursat men mile hain tujh se

ham bhare shahr ki khalvat men mile hain tujh se

saae se saaya guzarta hua mahsus hua

ik ajab khvab ki hairat men mile hain tujh se

itna shaffaf nahin hai abhi aks-e-dil-o-jan

aine gard-e-masafat men mile hain tujh se

is qadar tang nahin vusat-e-sahra-e-jahan

ham to ik aur hi vahshat men mile hain tujh se

juz gham-e-ishq koi kaam nahin hai so ai husn

jab mile ik nai halat men mile hain tujh se

vaqt ka sail-e-ravan rok hi lenge shayad

vo jo phir milne ki hasrat men mile hain tujh se

itna khush-fahm na ho apni pazirai par

ham kisi aur mohabbat men mile hain tujh se

yaad ka zakhm bhi ham tujh ko nahin de sakte

dekh kis alam-e-ghurbat men mile hain tujh se

ab agar laut ke aae to zara thahrenge

ham musafir hain so ujlat men mile hain tujh se

More Poems

Leave a Comment