Phir Uske Phande Mein Ja Rahe Hain Ki Jis Ke Phande Mein Ja Chuke The

phir us ke phande men ja rahe hain ki jis ke phande men ja chuke the

vahi musibat utha rahe hain ki jo musibat utha chuke the

kaho jo beja baja hai mujh ko saza hai jo na-saza hai mujh ko

ki un ka rona pada hai mujh ko jo muddaton tak rula chuke the

jo un ki khu thi so un ki khu hai jo guftugu thi so guftugu hai

phir un pe mitne ki aarzu hai jo har tarah se mita chuke the

adu ka main huun adu muqarrar barabar aa ke hue barabar

bhala badalta na rang kyuun kar vo rang apne jama chuke the

kisi se koi na dil lagae ‘nasim’ kya kaifiyat batae

vahi ab aansu bahane aae lahu jo mera baha chuke the

Leave a Comment