Ahmad Hamesh
jab se main khud ko kho raha huun
karvat badal ke so raha huun
ye jagna aur sona kya hai
ankhon men jahan samo raha huun
duniya se ulajh ke sar par shayad
apni hi bala ko dho raha huun
ye laag aur lagav kya hai
apna vajud hi dubo raha huun
ab tak jo zindagi hai guzri
kante nafas men bo raha huun
hai kuchh to apni parda-dari
na jagta huun na so raha huun
itna hai khot mere man men
paani men duudh bilo raha huun
ai dil-figar be-sabat hasti
teri hi jaan ko ro raha huun
jitni hai duur maut mujh se
itna hi qarib ho raha huun
shiraza yuun bikhar raha hai
khud men tabah ho raha huun
kis raste par ja rahi hai duniya
ye dekh ke hi to ro raha huun
jaane ‘hamesh’ khud ko kab se
be-vaj.h lahu men dubo raha huun
Leave a Reply