mere hi dil ke satane ko gham aaya sidha
rasta dekh liya hai mire ghar ka sidha
ek surat kabhi talea ki na dekhi ham ne
khat-e-taqdir likha hai ajab ulta-sidha
sidhi sidhi hamen har-vaqt suna baithte ho
naam sun paaya hai sahab ne hamara sidha
tedhi banke hue us shokh ke aage sidhe
kya hi kaj-fahm hai vo jo use samjha sidha
ishq-e-pechan ko kiya ham ne jo ada-tirchha
sarv ko yaar ne gulshan men banaya sidha
khat ke aane pe bhi tedha hi raha vo ham se
khizr ne bhi hamen rasta na bataya sidha
‘mehr’ vallah main qatil huun tiri baton ka
khuub andaz-e-sukhan hai tira sidha sidha
Leave a Reply