Shakeel Badayuni
har gosha-e-nazar men samae hue ho tum
jaise ki mire samne aae hue ho tum
meri nigah-e-shauq pe chhae hue ho tum
jalvon ko khud hijab banae hue ho tum
kyuun ik taraf nigah jamae hue ho tum
kya raaz hai jo mujh se chhupae hue ho tum
dil ne tumhare husn ko bakhshi hain rifaten
dil ko magar nazar se girae hue ho tum
ye jo niyaz-e-ishq ka ehsas hai tumhen
shayad kisi ke naaz uthae hue ho tum
ya mehrbaniyon ke hi qabil nahin huun main
ya vaqai kisi ke sikhae hue ho tum
ab imtiyaz-e-parda-o-jalva nahin mujhe
chehre se kyuun naqab uthae hue ho tum
uf re sitam ‘shakil’ ye halat to ho gai
ab bhi karam ki aas lagae hue ho tum
Leave a Reply