Badiuzzaman Khawar
mahsus ho raha hai jo gham meri zaat ka
sach puchhiye to dard hai vo ka.enat ka
ghar ki ghuTan se duur nikal jaa.e aadmi
saḌkon pe ḳhauf ho na agar hadsat ka
apne badan ko aur thakao na dosto
Dhal jaa.e din to bojh uThana hai raat ka
ik dusre ko zahr pilate hain log ab
baton men shahd ghol ke qand-o-nabat ka
har shaḳhs tere shahr men mujrim bana hua
phirta hai DhunDhta hua rishta najat ka
is men kisi ka aks na chehra dikha.i de
dhundla gaya hai aa.ina ‘ḳhavar’ hayat ka
Leave a Reply