Abdul Hafiz Naeemi
ghubar-e-dard se saara badan ata nikla
jise bhi khanda-ba-lab dekha gham-zada nikla
ab ehtiyat bhi aur kya ho be-libas to huun
ik astin se maana ki azhdaha nikla
mire khulus pe shak ki to koi vaj.h nahin
mire libas men khanjar agar chhupa nikla
laga jo piith men neza to samjhe dushman hai
magar palat ke jo dekha to ashna nikla
mire lahu se hai rangin jabin-e-sub.h to kya
chalo ki zulmat-e-shab ka to hausla nikla
ye haath raakh men khvabon ki dalte to ho
magar jo raakh men shola koi daba nikla
suna tha hadd-e-tabassum hai ansuon se qarib
badhe jo aage to barson ka fasla nikla
vo ek harf-e-tamanna jo kahte darte the
zaban pe aaya to un ka hi muddaa nikla
kulah kaj kiye din bhar jo shakhs phirta tha
gali men shaam ko dekha to vo gada nikla
tulu sub.h ‘naimi’ jahan se honi thi
usi ufuq se andheron ka silsila nikla
Leave a Reply