Ye Kachche Rang Hain Gahre Main Un Ko Dho Nahin Sakti

Poet

ye kachche rang hain gahre main un ko dho nahin sakti

sabhi kuchh janti huun is liye bhi ro nahin sakti

abhi tak aankh ke har zaviye men hijr ke gham hain

tumhare ḳhvab aate hain magar men so nahin sakti

purane peḌ ki Tahni huun par sarsabz huun ab tak

parinde ate-jate hain main buḌhi ho nahin sakti

mujhe vo sher kahne hain ki jin men dil dhaḌakte hon

main naqli phuul angan men kabhi bhi bo nahin sakti

bahadur main banun jitni magar ye bhi hai sach ‘iqra’

ki ab main mar to sakti huun pa tujh ko kho nahin sakti