sitam hai dil ke dhadakne ko bhi qarar kahen
tumhare jabr ko apna hi ikhtiyar kahen
sukun vahi hai jise chara-gar sukun kah den
kahan ye izn ki kuchh tere be-qarar kahen
chhupaen dagh-e-jigar phuul jitna mumkin ho
kahin na ahl-e-nazar un ko dil-figar kahen
faza hai un ki chaman un ke ashiyan un ke
khizan ke zakhm ko jo ghuncha-e-bahar kahen
piye hain ashk hazaron to lab pe aai hai
vo ik hansi ki jise farz-e-nagavar kahen
andheri shab men jalenge charagh ban ban ke
vo naqsh-e-pa ki jinhen raah ka ghubar kahen
samajh sakega vahan kaun raz-e-mai-khana
‘nasim’ tishna-labi ko jahan khumar kahen