har lahza kamin dil men tiri yaad rahegi
basti ye ujaḌne pe bhi abad rahegi
hai hasti-e-ashiq ka bas itna hi fasana
barbad thi barbad hai barbad rahegi
hai ishq vo ne.amat jo ḳharidi nahin jaati
ye shai hai ḳhuda-dad ḳhuda-dad rahegi
sayyad ko ma.alum na tha raaz ye shayad
ye ruuh qafas men bhi to azad rahegi
vo aa.e bhi to zabt se lab hil na sakenge
fariyad miri tishna-e-fariyad rahegi
ye husn-e-sitam-kosh sitam-kosh hai kab tak
kab tak ye nazar bani-e-be-dad rahegi
vo zulf-e-pareshan ka sanvare na sanvarna
vo un ke bigaḌne ki ada yaad rahegi
Leave a Reply