Meena Naqvi
tez jab gardish-e-halat hua karti hai
raushni din ki siyah raat hua karti hai
ranj aur gham ki jo barsat hua karti hai
daulat-e-ishq ki ḳhairat hua karti hai
jab ḳhayalon men dabe paanv vo aa jaata hai
vo mulaqat mulaqat hua karti hai
us ki ḳhamoshi bhi tufan ka pata deti hai
us ki har baat men ik baat hua karti hai
jis pe rishton ke nibhane ki ho zimmedari
us ke hisse men faqat maat hua karti hai
ye bhi hota hai mohabbat men suḳhan ka andaz
lab nahin khulte magar baat hua karti hai
jalta rahta hai charaghon men rifaqat ka lahu
hijr ki raat bhi kya raat hua karti hai
din ki bechainiyan raton ki taḌap be-ḳhvabi
us ki chahat ki ye saughat hua karti hai
Leave a Reply