bikte hain shahr men gul-e-be-khar har taraf
hai baghban ki garmi-e-bazar har taraf
kya fasl-e-gul phir aai jo karte hain zamzama
dam-e-qafas men murgh-e-giraftar har taraf
kothe pe us ke phenkun main kis raah se kamand
kam-bakht pasban to hain bedar har taraf
tode jahan the us ke shahidon ki khaak ke
tiir us ne maare naaz se do-char har taraf
jab us ki barq-e-husn se parda hua hai va
zaae hue hain talib-e-didar har taraf
ashiq ko us gali se nikalen the jab ba-zor
padti thi chashm-e-hasrat-e-didar har taraf
davat hai kis ki bazm-e-falak men jo kab se hain
ankhen lagae rakhna-e-divar har taraf
sabit bacha na kafir o din-dar tak koi
tegh-e-nigah ne us ki kiye vaar har taraf
saude men justuju ke tiri ai mata-e-husn
sar marte phiren hain kharidar har taraf
parvaz ka jo shauq hai bulbul ke musht par
kunj-e-qafas men udte hain na-char har taraf
hairan huun main ki kis ka ye kucha hai jis ke biich
tukde hue pade hain tarah-dar har taraf
ghaugha hai sharq o gharb o junub o shumal men
fitne jaga gai tiri raftar har taraf
go main hua muqim to kya dar hai ‘mushafi’
sair o safar men hain mire ashar har taraf
Leave a Reply