dil men utroge to ik ju-e-vafa paoge
mauj-dar-mauj samundar ka pata paoge
main to kho ja.unga tanha.i-e-jangal men kahin
tum bhare ghar men kahan mujh ko bhala paoge
dil se be-saḳhta umDe hain baḌhao kaf-e-dast
aaj aansu ko bhi ham-rang-e-hina paoge
aag hi aag sahi ḳhvab men jal kar dekho
is jahannum men bhi jannat ki hava paoge
gham uThane ka ye andaz batata hai ‘na.im’
ik na ik roz vafaon ka sila paoge
Leave a Reply