sach ko jhuuT bana jaata hai ba.az auqat
banda Thokar kha jaata hai ba.az auqat
ghar ki chhat par rim-jhim barish jalti dhuup
ye mausam bhi aa jaata hai ba.az auqat
achchhi qismat achchha mausam achchhe log
phir bhi dil ghabra jaata hai ba.az auqat
rozana tu raat ga.e ghar aata hai
shaam se pahle aa jaata hai ba.az auqat
jiit ke mujh se itna kyuun itrate ho
haar ke bhi jiita jaata hai ba.az auqat
tum ne nahaq rone ka ilzam diya
aankh men paani aa jaata hai ba.az auqat
‘manzar’ miThi baten bhi to karta hai
kaḌve bol suna jaata hai ba.az auqat
Leave a Reply