Poet
ḳhvab-e-rahat men kho ga.e hain log
hasb-e-ma.amul so ga.e hain log
rote rote rah-e-mohabbat men
ansuon ko bhi ro ga.e hain log
meri ankhon men kya nazar aaya
daf.atan aag ho ga.e hain log
kabhi taḌpe hain lala-o-gul par
kabhi kanTon pe so ga.e hain log
apne ehsas ke tanuron men
beshtar raakh ho ga.e hain log
ek tir-e-sitam ka kya shikva
kitne nashtar chubho ga.e hain log
meri rah-e-hayat men jaise
ḳhaar hi ḳhaar bo ga.e hain log
yahi rona hayat ka ‘nazim’
tum se pahle bhi ro ga.e hain log
Leave a Reply