ishq mehnat ka sila had se siva mangta hai
dil vo mazdur hai ujrat men vafa mangta hai
be-sabab saḌkon pe avara sa ik nanga badan
koi divana hai zaḳhmon ki qaba mangta hai
vo kasafat hai havaon men ki dam ghuT jaa.e
phir bhi jiine ki har insan dua mangta hai
tere is fe.al ka mafhum samajhna mushkil
tu hai muḳhtar magar meri raza mangta hai
ham qalandar ki nazar aur kahin hoti hai
ham nahin mangte vo shai jo gada mangta hai
gher rakkha hai use vaqt ke fir.aunon ne
raah paani men bana de vo asa mangta hai
paanv baḌhte nahin kuchle hue raston ki taraf
tera ‘maqsud’ alag apni disha mangta hai
Leave a Reply