Hassan Ahmad Awan
kuchh aql bhi rakhta hai junun-zad hamara
ab ishq men pagal nahin farhad hamara
ḳhemon se ubharne lagin matam ki sada.en
aur ham se ḳhafa ho gaya sajjad hamara
ik phuul ke khilne se bahut pahle jahan men
ik ḳhvab hua jaata hai barbad hamara
ik soch ki mahdud hi rahti hai rahegi
ik dil ka parinda hai ki azad hamara
ye bazm-e-suḳhan saz-e-suḳhan hi ki tag-o-taz
sunta hai yahan har koi irshad hamara
ye talḳhi-e-qismat hai ki sanson ki ata hai
aahon se bhare daman-e-fariyad hamara
ham qafiya-paima nahin sha.ir hue ‘hassan’
aur mir-taqi-‘mir’ hai ustad hamara
Leave a Reply