Tafzeel Ahmad
vahi be-libas kyariyan kahin bel buTon ke bal nahin
tujhe kya bula.un main baagh men kisi peḌ par koi phal nahin
hue ḳhushk bahr to kya hua miri naav zor-e-hava pe hai
mire badban hain bhare hue so bala se ret men jal nahin
hai dabav ashra havas par hain tamam uzv khinche rabar
huun uthal-puthal se ghira magar mujhe izn-e-radd-e-amal nahin
kisi be-ghurub nigah se kisi la-zaval shua men
sabhi zaviyon se alag-thalag mujhe hal karo mira hal nahin
tiri niind se baḌi aankh men mujhe tabkar kare kiran
mujhe aisi dhaat ka qalb de jise ḳhauf-e-radd-o-badal nahin
kahin paniyon men bichhi na ho kabhi sahilon si khuli na ho
vo zamin de mere jahaz ko jahan dusre ki pahal nahin
sabhi sard-o-garm ibaraten mire ḳhal-o-ḳhad ka hain zahira
jise taḳhliye ki amiin kahun vo sunane vaali ghazal nahin
Leave a Reply