zaḳhm sab us ko dikha kar raqs kar
eḌiyon tak ḳhuun baha kar raqs kar
jama-e-ḳhaki pe musht-e-ḳhak Daal
ḳhud ko miTTi men mila kar raqs kar
is ibadat ki nahin koi qaza
sar ko sajde se uTha kar raqs kar
duur haT ja saya-e-mehrab se
dhuup men ḳhud ko jala kar raqs kar
bhuul ja sab kuchh magar tasvir-e-yar
apne siine se laga kar raqs kar
toḌ de sab halqa-e-bud-o-nabud
zulf ke halqe men ja kar raqs kar
us ki chashm-e-mast ko nazron men rakh
ik zara masti men aa kar raqs kar
apne hi pairon se apna-ap raund
apni hasti ko miTa kar raqs kar
us ke darvaze pe ja kar daf baja
us ko khiḌki men bula kar raqs kar
Leave a Reply