mujh ko ab saqi-e-gulfam se kuchh kaam nahin
mai se kuchh kaam nahin jaam se kuchh kaam nahin
dil men khush aai hain sahra ki babulen pur-khar
ab kisi sarv-e-gul-andam se kuchh kaam nahin
apne aram se huun dasht-e-junun men tanha
kisi mahbub-e-dil-aram se kuchh kaam nahin
khana-barbad huun sahra men bagulon ki tarah
saqf-o-divar-o-dar-o-bam se kuchh kaam nahin
tair-e-ruh-e-ramida ki tarah chhuta huun
ab to sayyad tire daam se kuchh kaam nahin
tab-e-raushan ko nahin khauf siyah-rozi ka
subh-e-mahshar huun mujhe shaam se kuchh kaam nahin
itni muddat se huun ghurbat men vatan bhuul gaya
mujh ko ab nama-o-paigham se kuchh kaam nahin
hai firaq-e-but-e-khud-kam men ‘nasikh’ ka kalam
huun main nakam mujhe kaam se kuchh kaam nahin
Leave a Reply