Tauseef Tabassum
vo avvalin dard ki gavahi saji hui bazm-e-ḳhvab jaise
vo chashm-e-surma kalam karti vo saare chehre kitab jaise
vo aankh saya-fagan hai dil par jo be-ḳhudi ka hai isti.ara
ghuli hui nilgun samundar men tal.at-e-mahtab jaise
bas ek dhamaka ki raat ki sarhadon ka kuchh to suragh paa.en
bas ek chingari chahta ho fatila-e-aftab jaise
vo jis ki padash men sahar-zad apni ankhen ganva chuke hain
ik aur ta.abir chahte huun vo avvalin shab ke ḳhvab jaise
vo mauj-e-sarkash jo sahilon ko Dubo ga.i kaise TuTti hai
is ek manzar ke dekhne ko khuli ho chashm-e-habab jaise
miri mizha se Tapakta aansu ho jaise har Dubta sitara
likha gaya ho miri hi palkon pe rat-jagon ka hisab jaise
lahu jo rizq-e-zamin hua hai vo barishon men dhula nahin hai
tamam a.inda mausamon ke ho naam ye intisab jaise
Leave a Reply