josh ubalta hai pighalti hai tamanna dil men
aag hi aag hai is soz-sarapa dil men
tera jalva hai ki rangin sa dhoka dil men
kabhi zulmat kabhi paida hai ujala dil men
ab nahin tere do-alam ki zarurat mujh ko
ishq ne tere basa di na.i duniya dil men
apni ankhen to uTha mahv-shuda jalve bhi
nazar a.enge tujhe anjuman-ara dil men
naaz tha un ko ki har qaid se azad hain vo
main ne kar hi liya paband-e-tamanna dil men
phunkta rahta hai kaunain ko jin ka partav
be-zarar hai unhin jalvon ka tamasha dil men
aap hi baada huun main aap hi saaqi ‘maḳhmur’
saghar ankhon men miri aur hai miina dil men
Leave a Reply