jo duur se hamen akasr ḳhuda sa lagta hai
vahi qarib se kuchh ashna sa lagta hai
kabhi hamari nigahon se dekh le us ko
phir us ke ba.ad bata tujh ko kaisa lagta hai
tamam raat jale din ko sard-mehr bane
badan ka shahr bhi shahr-e-ana sa lagta hai
vo us ki sahmi si chahat jafa ki chilman men
vo bevafa bhi hamen ba-vafa sa lagta hai
bikharte TuTte in ziist ke makanon men
vo ik makan hamen ḳhushnuma sa lagta hai
salib-o-dar pe chaḌh kar hue hain la-fani
ye dast-e-marg bhi dast-e-dua sa lagta hai
Leave a Reply