be-ḳhud aisa kiya ḳhauf-e-shab-e-tanha.i ne
subah se sham.a jala di tire sauda.i ne
hasb-e-mansha dil-e-pur-shauq ki baton ka javab
de diya sharm men Duubi hui angḌa.i ne
hu ka aalam hua us samt ko uḌne lagi ḳhaak
jis taraf ghaur se dekha tire sauda.i ne
qatl par mere baha.e na kisi ne aansu
daad qatil ko di ik ek tamasha.i ne
puchhne vaale bhari bazm men qatil ko na puchh
naam tera hi agar le diya sauda.i ne
mangta huun dar-o-divar se baton ka javab
aisa divana kiya hai gham-e-tanha.i ne
hijr ki raton men ‘manzar’ mire kaam aa aa ke
le liya mol charagh-e-shab-e-tanha.i ne
Leave a Reply