Dar Talak Aa Ke Tuk Aawaz Suna Jao Ji

dar talak aa ke tuk avaz suna jaao ji

apne mushtaq ko itna bhi na tarsao ji

ghair ke saath se bhage hai mujhe dekh to main

us se kahta huun ki us ko tumhi thahrao ji

main jo ik roz bulaya unhen ghar jaate dekh

paas aa baith ke kahne lage farmao ji

shana kya zulf-e-pareshan men karo ho baithe

apne uljhe hue balon ko to suljhao ji

zanu-e-ghair pe shab sar na rakha tha tum ne

jaao jhuti na mire sar ki qasam khaao ji

mujh se kya puchho ho kya ji men tire hai sach kah

hai jo kuchh ji men mire tum hi samajh jaao ji

raat andheri hai chale aao mire ghar chhup kar

aa ke phir chand sa mukhda mujhe dikhlao ji

ishq men hote hain myan-‘mushafi’ sau tarah ke gham

go gham-e-hijr hai itna bhi na ghabrao ji

Leave a Comment