Chashm-O-Gosh Pe Pahre Hain

chashm-o-gosh pe pahre haiñ

andhe haiñ sab bahre haiñ

dukh kī āñkheñ niilī haiñ

dukh ke baal sunahre haiñ

naqsh abhī hai ḳhaal tirā

rañg bhī tere gahre haiñ

merā koī naam nahīñ

jaane kitne chehre haiñ

ma.anī par koī qaid nahīñ

lafzoñ par kyuuñ pahre haiñ

dhyān ke ras meñ Duube lab

bosa bosa chehre haiñ

ashkoñ kī bārish hogī

dukh ke bādal gahre haiñ

ghar kā rasta bhūle ‘mus.haf’

ik hotel meñ Thahre haiñ

Leave a Comment