Abu Mohammad Sahar
kho ke dekha tha pa ke dekh liya
har tarah dil dikha ke dekh liya
phir khule ibtida-e-ishq ke baab
us ne phir muskura ke dekh liya
yaad kuchh bhi raha na us ke siva
ham ne us ko bhula ke dekh liya
zindagi ne khushi ke dhoke men
rabt gham se badha ke dekh liya
aise bichhde ki phir mile na kabhi
khuub daman chhuda ke dekh liya
khvab mub.ham khayal be-maani
ranj-e-duri utha ke dekh liya
kitne biite dinon ka gham tha ‘sahar’
aaj jis ne rula ke dekh liya
Leave a Reply