Rais Amrohvi
jahan ma.abud Thahraya gaya huun
vahin suuli pe laTkaya gaya huun
suna har baar mera kalma-e-sidq
magar har baar jhuThlaya gaya huun
kabhi maazi ka jaise tazkira ho
zaban par is tarah laaya gaya huun
abhi tadfin baaqi hai abhi to
lahu se apne nahlaya gaya huun
davami azmaton ke maqbare men
hazaron baar dafnaya gaya huun
taras kaisa ki is dar-ul-bala men
azal ke din se tarsaya gaya huun
na jaane kaun se sanche men Dhalen
abhi to sirf pighlaya gaya huun
main is hairat-sara-e-ab-o-gil men
ba-hukm-e-ḳhas bhejvaya gaya huun
Leave a Reply