jab tamashe ka na ho chhoḌ ke aane ka malal
kyon ho phir khel ke adab nibhane ka malal
aisi tanha.i ki lat hai ise bas kya kahiye
ghar ko hota hai mire lauT ke aane ka malal
kaisa mayus tha vo daur-e-ḳhizan bhi mat puchh
tha use shaḳh se patton ko girane ka malal
pahle to us ko bhulane men ka.i saal lage
ab ka.i saal se hai us ko bhulane ka malal
teri duniya ki taraf thi mire dil ki manzil
dil ko ab tak hai usi guzre zamane ka malal
Leave a Reply