Aziz Lakhnavi
kar chuke barbad dil ko fikr kya anjam ki
ab hamen de do ye miTTi hai hamare kaam ki
Duub de de bada-e-gul-rang men zahid agar
dekhiye ranginiyan phir jama-e-ehram ki
aks-e-abru dekhte hain bada-e-sar-josh men
iid hai saqi-paraston men hilal-e-jam ki
ibtida-e-ishq hai aur bujh raha hai dil mira
ho chali dhimi abhi se lau charagh-e-sham ki
aankh men aansu hain mathe par araq hai maut ka
le ḳhabar umr-e-ravan apne chhalakte jaam ki
ho ga.i bazicha-e-atfal be-zauq-o-shu.ur
sha.iri jo thi muradif ma.ani-e-ilham ki
puḳhtagi samjhe hue hain jo tanasub ko faqat
chahiye islah un ko is ḳhayal-e-ḳham ki
hai ye nazuk fan jo shayan-e-tahi-maghzi nahin
daur-e-majlis men zarurat kya hai ḳhali jaam ki
hai ‘aziz’ a.ina-e-lafzi mura.atun-nazir
husn-e-ma.ani jab nahin phir sha.iri kis kaam ki
Leave a Reply