Khwaja Razi Haidar
qarz kya kya nazar pe nikle hain
jab bhi sair-o-safar pe nikle hain
jangalon se guzarne valon ke
raste mere ghar pe nikle hain
naam puchha hai rahgiron ne
jab kabhi rahguzar pe nikle hain
zaḳhm phuTe hain ja-ba-ja tan par
kya shagufe shajar pe nikle hain
kya musibat hai shahr valon par
rakh ke saman sar pe nikle hain
saath le kar kitab yadon ki
ek lambe safar pe nikle hain
dasht-o-sahra se ghum-phir ke ‘razi’
ab shanasa Dagar pe nikle hain
Leave a Reply