tha ghair ka jo ranj-e-judai tamam shab
niind un ko mere saath na aai tamam shab
shikva mujhe na ho jo mukafat had se ho
vaan sulh ek dam hai ladai tamam shab
ye dar raha ki sote na paaen kahin mujhe
vaade ki raat niind na aai tamam shab
sach to ye hai ki bol gae aksar ahl-e-shauq
bulbul ne ki jo nala-sarai tamam shab
dam bhar bhi umr khoi jo zikr-e-raqib men
kaifiyat-e-visal na paai tamam shab
thoda sa mere haal pe farma kar iltifat
karte rahe vo apni badai tamam shab
vo aah taar o paud ho jis ka hava-e-zulf
karti hai ambari o sabai tamam shab
vo subh jalva jalvagar-e-bagh tha jo raat
murgh-e-sahar ne dhuum machai tamam shab
afsane se bigad hai an-ban hai khvab se
hai fikr-e-vasl o zikr-e-judai tamam shab
jis ki shamim-e-zulf pe main ghash huun ‘shefta’
us ne shamim-e-zulf sunghai tamam shab
Leave a Reply