Muzaffar Warsi
aadmi chaunk chuka hai magar uTTha to nahin
main jise DhunDh raha huun ye vo duniya to nahin
ruuh ko dard mila dard ko ankhen na milin
tujh ko mahsus kiya hai tujhe dekha to nahin
rang si shakl mili hai tujhe ḳhushbu sa mizaj
lala-o-gul kahin tera hi sarapa to nahin
chehra dekhun to ḳhad-o-ḳhal badal jaate hi
chhup ke a.ine ke pichhe koi baiTha to nahin
phenk kar maar zamin par na zamane mujh ko
TuuT hi ja.unga jaise main khilauna to nahin
zindagi tujh se har ik saans pe samjhauta karun
shauq jiine ka hai mujh ko magar itna to nahin
meri ankhon men tire naqsh-e-qadam kaise hain
is sara.e men musafir koi Thahra to nahin
sochte sochte dil Dubne lagta hai mira
zehan ki tah men ‘muzaffar’ koi dariya to nahin
Leave a Reply